ஜெ.வை நினைவுகூர்ந்த அரசு பள்ளி மாணவிகள்..!

    தமிழக முன்னாள் முதலமைச்சர் ஜெ.ஜெயலலிதாவின் 72-வது பிறந்த நாளை முன்னிட்டு பெண் குழந்தைகள் பாதுகாப்பு தின உறுதிமொழி எடுப்பு ராணியார் அரசு மகளிர் மேல்நிலைப்பள்ளியில் நடைபெற்றது. மாவட்டத்தில் மிக பழமையானதும் 200 வருடங்கள் முன்பு ஆரம்பிக்கப்பட்டதுதான் ராணியார் அரசு மேல்நிலை பெண்கள் பள்ளி. இங்கு முன்னாள் முதலமைச்சர் ஜெயலலிதாவின் 72-வது பிறந்த தினத்தை முன்னிட்டு தமிழக அரசின் உத்தரவுப்படி பெண் குழந்தைகள் பாதுகாப்பு தின உறுதிமொழி ஏற்பு இன்று நடைபெற்றது. முன்னதாக பள்ளியின் முதல்வர் 'ஜெயலலிதா' தமிழகத்திற்கு ஆற்றிய சாதனைகளை குறித்து விழாவில் பேசினார்.குறிப்பாக, பெண்களுக்கு பெண் குழந்தைகள் பாதுகாப்பாக வாழ என்னென்ன வழிமுறைகள் உள்ளிட்ட அனைத்தையும் எடுத்துரைத்தார். இதனை எடுத்து உறுதிமொழி ஏற்கப்பட்டது. பள்ளியின் மாணவிகள் உறுதிமொழியை வாசிக்க மற்ற மாணவிகளும் கைகளை நீட்டி உறுதிமொழி எடுத்துக்கொண்டனர்.
பின்னர், இதுகுறித்து புவனா என்ற மாணவி தெரிவிக்கையில், புரட்சித்தலைவி அம்மா எங்களுக்கு பிறப்பது முதல் இறப்பது வரை எண்ணற்ற பல உதவிகள் செய்தார்கள் என்றும், இதுபோன்ற உதவிகளை இதுவரை யாரும் செய்யவில்லை என்றும், புரட்சித்தலைவி அம்மாவை தொடர்ந்து தமிழகத்தில் தற்போது ஆட்சி செய்து வரும் முதல்வர் மிக சிறப்பான முறையில் எங்களுக்கு பல்வேறு பெண் பாதுகாப்பு பற்றிய விழிப்புணர்வும் பெண்களின் முன்னேற்றத்திற்கு பல்வேறு நிதிகளை ஒதுக்கியும் பாதுகாப்பாகவும் இருந்து வருகிறார் என்றும் அவருக்கு கோடான கோடி நன்றி எனவும் தெரிவித்தார்.மறைந்த முன்னாள் முதல்வர் ஜெயலலிதா பெண்கள் மற்றும் பெண் குழந்தைகளுக்காக; தொட்டில் குழந்தை திட்டம், பெண் குழந்தை பிறப்பு வைப்பு நிதி, பெண்கள் சுய உதவி குழு, இலவச சானிட்டரி நாப்கின் வழங்கும் திட்டம், பாலூட்டும் தாய்மார்களுக்கு தனி அறைத் திட்டம், அம்மா குழந்தைகள் நல பரிசு பெட்டகம் ஆகிய பல திட்டங்களை கொண்டு வந்தார் என்பது குறிப்பிடத்தக்கது.